Comezamos 21 días en galego!

Este luns 27 de xaneiro comezou a campaña "21 días en galego" no cole implicámonos totalmente nela, pois cremos que esta campaña de promoción do uso da lingua galega é moi necesaria debido a falta de competencia oral e escrita que o profesorado está a constatar no noso alumnado por causa do dramático abandono do noso idioma que estamos a vivir. Para os nosos rapaces/rapazas, o galego é case unha lingua estranxeira na que non posúen fluidez e realizan aberrantes traducións do castelán na súa expresión oral e escrita.

Esta campaña de promoción da nosa lingua que leva a cabo o Concello de Moaña en colaboración cos centros de ensino durará ata o domingo 16 de febreiro.

Algunhas das vantaxes que nos aportará o participar nesta campaña son:

·         Conseguir fluidez na súa expresión oral e así obter mellores resultados nas probas que requiran observar esta competencia (exposicións, exames orais…).

·         Mellorar a súa competencia escrita, eliminando paulatinamente os castelanismos polos que son penalizados nas probas que requiran esta competencia (exames, redaccións…).

·         Está demostrado cientificamente que as persoas que dominan máis linguas teñen máis facilidade para adquirir outros idiomas.

·         A través do galego resulta doado o achegamento ao portugués, o que pode repercutir en beneficios laborais xa que o portugués é a sétima lingua máis falada do mundo (máis de dous centos millóns de persoas).

·         E, por suposto, como seres humanos preocupados pola cultura, reverter este abandono paulatino do noso idioma que podería levar ao seu esmorecemento. E, como galegos, non deixaremos morrer a nosa lingua; fomentarémola para que volva a ter a vitalidade que noutros tempos tivo.

Finalmente, non queremos deixar de mencionar que o EDNL e o Claustro está abraiado e orgulloso pola cantidade de alumnos e alumnas que, voluntariamente, inscribíronse nos “21 días en galego”.

Sen máis, agradecemos de antemán a todos e todas que vaian participar na nosa campaña e agardamos que resulte unha actividade normalizadora e enriquecedora. 

O Equipo de Dinamización da lingua Galega

 do CEIP de Abelendo